As mulleres de Castelao

As persoas que se acheguen á Biblioteca de Galicia atoparanse cunha mostra que comeza pola nai, dona Joaquina Castelao Genme. As fotos de familia que amosamos compleméntanse con documentos da infancia de Daniel e debuxos que recrean a figura materna.

Ocúpase a segunda vitrina da figura de Virxinia Pereira, muller e compañeira inseparable de Castelao desde 1912 ata a súa morte. A selección documental sitúa aquí o foco na dimensión máis íntima de Castelao, desde os anos do noivado a derradeira etapa en Bos Aires.

A súa irmá Teresa comparece de seguido como encarnación do amor fraternal. Castelao non volvería a pisar terra galega desde xullo de 1936. De conservar a memoria do irmán e de facer fronte ás vicisitudes legais que afectaron á propiedade intelectual e os dereitos de autor da súa obra vaise encargar Teresa, a máis lonxeva das irmáns.

Outras dúas mulleres farán acto de presencia pola súa peculiar vinculación con Alfonso Daniel Rodríguez Castelao. Unha delas é María Docampo, coa que Castelao entrou en contacto en Nova York, e que lle ía servir de interprete durante a súa estadía nos Estados Unidos. A outra, a actriz Maruxa Villanueva, lucense da aldea de Lousame, emigrada a Bos Aires e a que levará aos escenarios unha das obras más senlleiras desta icona da nosa cultura, Os vellos non deben de namorarse. 

A imaxe gráfica desta mostra corre a cargo da ilustradora viguesa Alba Casanova. Cunha forte pegada persoal e conceptual, empregando as linguaxes do debuxo, a fotografía e o colaxe, a interpretación de Alba das mulleres presentes na vida de Castelao aparece reflectida como as mans que o sostiveron, acompañadas de múltiples pistas que nos achegan ao periplo vital deste rianxeiro universal.