Tesourerias do noso

A recolla dun patrimonio único

Ao longo do tempo, algunhas persoas ilustradas tiveron a sensibilidade de recoñecer o valor deste tesouro, polo que a exposición reúne unha boa representación dos libros con estas recollas. Estas inicialmente centráronse na palabra, pero foron engadindo partituras, bailegramas e, cando foi posible, rexistraron o son, a imaxe fixa e a imaxe en movemento. 

Por iso ofrécese unha boa mostra de materiais audiovisuais coas voces e as cántigas e coplas que reuniron estas persoas. Ao mesmo tempo, tamén se mostran as creacións musicais posteriores que recollen e/ou revitalizan con aires contemporáneos esa tradición oral.

Entre os documentos tamén hai recortes de prensa, fotografías, comentarios de grandes recolleitadores de material como Dorothé Schubart, coautora con Antón Santamarina do “Cancioneiro popular galego”, considerada a Biblia da nosa tradición oral. Tamén destacamos a obra póstuma de Sarmiento onde deixa patente a importancia do papel das mulleres nesta tradición e a casete “Recolleita”, a primeira gravación feita en Galicia onde intervén unha pandeireteira. Dúas vitrinas conteñen material sobre as propias cantareiras homenaxeadas e sobre as anónimas, das que as primeiras non son máis ca unha pequena representación.

Dada a importancia da oralidade e a música nesta temática, a parte bibliográfica compleméntase cunha mostra audiovisual, onde poden verse documentais, actuacións e reportaxes de cantareiras e expertos, e escoitarse coplas e voces de moitas desas mulleres ás que agradecemos a súa habilidade, a súa creatividade e por suposto a súa memoria.