Unha viaxe chea de historias, música e imaxinación abre as portas do universo literario de Begoña Caamaño no espectáculo de Vero Rilo e Luís Iglesias
Unha viaxe chea de historias, música e imaxinación abre as portas do universo literario de Begoña Caamaño en Chaves invisibles, o espectáculo con música ao vivo de Vero Rilo e Luís Iglesias que nos convida a mergullarnos na palabra da homenaxeada nas Letras Galegas 2026.
A Biblioteca de Galicia acolle este domingo día 17 de maio esta proposta que convida ao público a facer unha viaxe por historias de fantasía e aventura, con nenas valentes, mulleres sabias, seres mitolóxicos e relatos que atravesan o tempo. A viaxe constrúese da man do libro Bego e o mundo do revés, de Iria Collazo López, e doutros relatos que fan da palabra un espazo de descubrimento constante.
Chaves invisibles é unha festa musical que celebra a lectura como un territorio de liberdade, onde cada historia funciona como unha chave e cada nena ou neno é quen a fai xirar.
Vero Rilo, narradora de contos e historias de vida, combina a tradición oral con música, memoria e unha mirada feminista e comprometida. Luís Iglesias, músico e artista multidisciplinar, achega a creación sonora e a guitarra, cunha ampla traxectoria en proxectos escénicos e culturais. Xuntos dan forma a unha proposta que une narración e música para celebrar o poder das historias compartidas.
Día das Letras Galegas 2026
ACTIVIDADE: Espectáculo con música ao vivo
TÍTULO: CHAVES INVISIBLES
COMPAÑÍA: Vero Rilo & Luís Iglesias
DATA: 17.05.2026
PÚBLICO: Familiar e infantil (recomendado a partir de 7 anos)
LUGAR: Auditorio Neira Vilas da Biblioteca de Galicia
HORARIO: 18:00 horas
DURACIÓN: 45 minutos
De balde, previa inscrición na web da Cidade da Cultura
INFORMACIÓN PRÁCTICA
- Se as prazas están esgotadas, estade atentas/os porque pode quedar algunha libre ao haber anulacións
- Para calquera consulta, contactar con
bibliotecadegalicia [at] xunta.gal (bibliotecadegalicia[at]xunta[dot]gal)
