Día Internacional do Libro Infantil e Xuvenil 2025

Día do libro infantil e xuvenil 2025

Con motivo desta efeméride, a Biblioteca de Galicia agasallará bolsiñas de libros sorpresa a toda os nenos e nenas que se acheguen ata o centro

Con motivo da celebración do Día Internacional do Libro Infantil e Xuvenil este 2 de abril, a Biblioteca de Galicia agasallará bolsiñas de libros sorpresa a toda os nenos e nenas que se acheguen ata as súas instalacións, ata esgotar existencias.
 
Como cada ano dende 1967, o IBBY, a Organización Internacional para o Libro Xuvenil, chama á conmemoración desta efeméride , coincidindo coa data de nacemento do escritor danés Hans Christian Andersen.
 
O seu obxectivo é promocionar os bos libros infantís e xuvenís e a lectura entre os máis novos. Este 2025 o día é patrocinado pola sección do IBBY dos Países Baixos que seleccionou o traballo da escritora Rian Visser e da ilustradora Janneke Ipenburg, encargadas de elaborar a mensaxe e o cartel dirixidos a todas as nenas e nenos do mundo.
 
O tema deste ano é A liberdade da imaxinación e o lema é a última frase do poema Linguaxe Visual: "Estas palabras que saíron da miña boca son para ti". Obra que provén da colección ilustrada de poesía Alle wensen van de wereld (2021), de Visser e Ipenburg, e que foi traducida ao galego por Gálix, a Asociación Galega do Libro Infantil e Xuvenil.

Dúas creadoras neerlandesas

Rian Visser (1966) é unha poeta e escritora de libros infantís neerlandesa. Escribe libros divertidos e emocionantes que se adaptan perfectamente aos intereses da rapazada. Xunto á ilustradora Janneke Ipenburg creou as coleccións de poesía Alle wensen van de weld (2021) e Het is een zachte dag vandaag (2024). En 2022 gañou un Zilveren Griffel e a Gouden Poëziemedaille (Medalla de Ouro de Poesía). Visser é unha persoa moi activa no ámbito educativo.

Deseña clases dixitais sobre escritura creativa e fomento da lectura que os profesores poden utilizar de forma gratuíta. Desde 2024 ata 2026 foi nomeada oficialmente Poeta Infantil dos Países Baixos.

 

Janneke Ipenburg (1979) é unha ilustradora neerlandesa de libros infantís. Ilustrou dúas coleccións de poesía con Rian Visser, entre elas Het is een zachte dag vandaag (2024). Como autora e ilustradora creou o libro Voor altijd bij jou (2023), unha historia sobre como estar conectado a pesar dunha distancia inconmensurable. 

Ademais do seu traballo como ilustradora infantil, Janneke traballou en varias películas de animación e actualmente traballa como deseñadora de personaxes nunha gran película de animación stop-motion chinesa. En 2023 estivo na listaxe de finalistas dos World Illustration Awards

 

Documentación