Obradoiro | A galiña dos ovos de conto

Coñecedes a Rosiña? É unha galiña que pon ovos de conto! Si, liches ben, unha galiña que pon ovos que son personaxes de conto. A pobriña está nun apuro: ten unha encarga de varias ducias destes ovos para a feira e non dá feito. Botámoslle unha man? 

Unha actividade creativa que xunta narración e obradoiro, literatura e plástica, na que a rapazada, despois de escoitar a narración da vida da galiña, elaborará bonecos dos personaxes dun conto que inventarán coa axuda da pita. Non é unha narración pasiva, senón moi participativa na que a cativada manipulará os bonecos e colaborará na creación da historia. 

Presentaremos a Rosiña, que é moi particular xa que está feita de papel, come letras e pon ovos que son personaxes de conto. Entre todas e todos imos darlle de comer e recolleremos uns ovos do galiñeiro; con cada un que vaiamos sacando iremos enchendo unha caixa e contando un conto. Mais a galiña non puxo suficientes ovos para rematar a historia! Así comeza a segunda parte da sesión na que aprenderemos a modelar novos bonecos e remataremos colectivamente o conto. Aprenderán a facer a masa e levarán a receita para facela e xogar con ela todas as veces que queiran.