Visita guiada á Biblioteca de Galicia polo Día do Libro

Como cada ano o 23 de abril, a Biblioteca de Galicia únese á celebración do Día do Libro cunha proposta que trata de achegar o funcionamento da institución ao público, abrindo as súas portas a unha visita guiada que percorre lugares das instalacións ás que non se pode acceder normalmente. Ademais, como é costume neste tipo de celebracións, haberá agasallo de libros sorpresa para as persoas usuarias que se acheguen durante esta xornada á Biblioteca.

Visita guiada

Nestas visitas especiais que organiza a Biblioteca co motivo de efemérides específicas, o persoal técnico explicará aos asistentes os servizos que ofrece a institución, amosando espazos de acceso restrinxido onde se custodian a maior parte dos seus fondos e máis curiosidades.

A visita nesta xornada será en horario de mañá, ás 12.00 horas, e durará unha hora aproximadamente. A proposta é de balde e precisa inscrición na web da Cidade da Cultura ata esgotar as 15 prazas dispoñibles.

Agasallo de libros

A Biblioteca selecciona para esta ocasión unha serie de libros para completar cen bolsas de agasallo. Todas as persoas que se acheguen ás instalacións durante a xornada do 23 de abril poderán coller unha destas bolsas sorpresa, situadas no mostrador de acceso á sala de consulta. Entregaranse ata agotar existencias.