Nova xornada técnica na Biblioteca de Galicia
Desde a Biblioteca de Galicia organízase unha nova xornada técnica baixo o título “Bibliotecas especializadas e Centros de documentación”. Este será o terceiro ano consecutivo no que a Biblioteca de Galicia pon en marcha este programa co obxectivo de mellorar a formación e dar a coñecer outras realidades bibliotecarias aos profesionais que traballan nas institucións da memoria galegas.
Neste ano 2019 o tema protagonista das xornadas do primeiro semestre serán as Bibliotecas especializadas e os Centros de documentación. Por elo estarán presentes algunhas das institucións que responden a esta tipoloxía máis importantes do noso país, como a Biblioteca do Museo do Prado, a Biblioteca do Congreso dos Deputados ou o Centro de Documentación de RTVE. O obxectivo será achegar aos bibliotecarios galegos como son as coleccións que xestionan, que servizos ofrecen, que tipo de usuarios acoden a elas ou que retos deberán afrontar no futuro.
Esta nova xornada terá lugar o día 21 de xuño no Auditorio Neira Vilas da Biblioteca de Galicia. A inscrición para algunha das 100 prazas dispoñibles será de balde a través da web cidadedacultura.org.
O horario será de 9:00 a 17:30 horas, con dous descansos entre intervencións, o primeiro para un café entre as 11:45 e as 12:15 e o segundo para unha comida lixeira entre as 14:30 e as 15:45 h.
Tanto a inscrición como os refrixerios programados na xornada serán de balde. Como nas xornadas anteriores a inscrición poderá realizarse, a partir do mércores 29 de maio ás 09:00 horas, e ata completar as 100 prazas dispoñibles, na web http://www.cidadedacultura.gal/gl .
